Sereke | Beşê Erebî | Beşê Çandî | Gotarekî Rêke | Erşîv

Sereke

Ger



 

 
 

Gotar: Mamoste Mihemed Berzencî Nas Bikin!

 


 Konê Reş

  Bi min xweş e ku ez Mihemed Berzencî welatparêz û evîndarê zimanê kurdî bibîr bînim û bi we bidim naskirin. Evê ku di rojên teng û dijwar de karîbû pirtûkekê bi navê (Fêrkirina Zimanê Kurdî bê Mamoste), ji me re berhev bike.. Erê wî! Ku ez û te wî bibîr neynin, ma wê kî wî bibîr bîne û bide naskirin.. Wek ku diyar e, ji ber sansora li ser henûna me kurdan û zimanê me hebû, gelek tiştên me, navdarên me û welatparêzên me di tariyê de mane..Pêwîste em li wan bigerin û mafê wan li wan vegerînin.. bi kêmayî wan bi welatiyên wan bidin naskirin.


Mihemed Berzencî jî yek ji wa ye; kurê Mela Sebriyê Berzencî ye, li Qamişlo çêbûye, ji ber gelek sideman mala xwe bariye Şamê û li wir, li ber destê Apo Osman Sebrî fêrî xwendin û nivîsandina zimanê Kurdî bûye.. Digel çend hevalên xwe; Cewad Mela, Newroz Alûsî, Zoro Metînî û Îbrahîm Zaza rojnameyekê bi navê (Hişyarî) weşandine, du-sê hejmar ji wê rojnameyê hatine çapkirin. Hezkirina wî ji zimanê kurdî re hişt ku pirtûkekê bi navê (Fêrkirina Zimanê Kurdî bê Mamoste) berhev bike. Ev pirtûka wî di nav kurdên Sûriyê de yekemîn pirtûka fêrkirina zimanê kurdiye bê mamoste ye.. Belê wek ku em tev zanin, gelek Alfabe ji zimanê kurdî re hatine weşandin, wek Alfabeya Mîr Celadet Bedirxan, Mîr Dr. Kamîran Bedirxan, Osman Sebrî û di pey wan re jî gelek alfabe hatine weşandin.. Lê her eva rehmetî Mihemed Berzencî ji tevan cuda ye..
  Wî, ev pirtûka xwe (Fêrkirina Zimanê Kurdî bê Mamoste), di bin çavnerîn û şêwirdariya Apo Osman Sebrî de berhev kiriye û di dawiya sala 1978an de, bi alîkariya mamostayê dilsoz Rebhan Remedan çûye Beyrûtê, da ku (Partiya Hevgirtina Gel) û serokiya mamoste Selah Bedredîn vê pirtûka wî di nav weşanên Kombena Kawa a Çanda Kurdî de çap bike.. Û wiha ev pirtûka wê hatiye çapkirin.. Di havîna 1980î de, dema ku hunermend Şivan Perwer hat Beyrûtê, ez û hunermendê rehmetî Seîd Yusiv li ser daxwaza Şivan Perwer, em ji Qamişlo çûn Beyrûtê.. Piştî ku me hev dît û me çend rojên xweş li Beyrûtê derbas kirin, em çûn serdana mamoste Salah Bedredîn û Mustafa cumaa.. Di wê serdanê de mamoste Selah çend pirtûkên ku Kombenda Kawa nû çapkirbûn diyarî min kirin, yek ji wan pirtûkan ev pirtûka ku Mihemed Berzencî ya bi navê (Fêrkirina Zimanê Kurdî bê Mamoste) hebû.
  Dema ku Mihemed Berzencî di sala 1981ê li Şamê çû ber dilovaniya Xwedê, Apo Osman Sebrî ev gotin ji kêla ber serê wî nivîsand:
Ev xortê ciwan
Ji dil xwe diwestand ji bona ziman
Gelek xort jê nasîn; gelnasî çiye?
Ziman e, ziman e, bê wî gel niye..
Mixabin zûka çû, ji vê dinya han
Jê xweş bin, heval û hoir û Xwedan
Osman Sebrî 1981

Qamişlo, 11/3/2021


 
Gotar Nerîne Xwediyê Xwene
 

Puanên Nûçeyê

Asta Dengan: 4
Bi Tevahî Deng: 4


Ji kerema xwe re kurtedemeke xwe bide vê dengdanê:

Herî baş
Pir baş
Baş
Ne xirab
Xirab

Vebijark