Sereke | Beşê Erebî | Beşê Çandî | Gotarekî Rêke | Erşîv

Sereke

Ger



 

 
 

Daxuyanî: Daxuyaniyek bi helkefta koça dawî ya Seydayê Tîrêj

 


Îro, 19 sal di ser koça dawî ya Seydayê Tîrêj re dibûrin, Seyda weke îro, di 23.03.2002an de serê xwe danî, û ji nav me bar kir, koça dawî kir, û li gundê Girkeftar, ê ko dikeve bakurî Hisiça, hate veşartin, gelê Kurd li herêmê bi karwanekî gelekî mezin û gelekî dirêj, bi hezaran, pêre çûn heya ser gora wî, û ew roj, li Rojavayî Kurdistanê, bû rojeke bi nav û nîşan ….
Seydayê Tîrêj, di sala 1923an, li gundê Nicim, ê ko dikeve rojavayî bajarê Qamişlo, ji dayik bûye, ew heşt salî bû, li gundê Sêmitikê Newaf, û li ser destê Mela Ibrahîmê Golî, Quraan û çend pirtûkên ayinî xwendin, piştre li Amûdê di dibistana fermî de pênc salan xwend;


 li Amûdê gelek rewşenbîr û helbestvanên navdar naskirin, û ji nêzîk ve têkilî bi wan re danîn, wek Seydayê Cegerxwîn, Qedrî Can, Nûredîn Zaza, Hemze begê Muksî, û gelekên din, gelekî bandora wan li ser wî hebû, bîr û baweriyên wî fireh û geş bûn, çavên wî gelekî vebûn, loma yekser dest bi hûnandina helbestan kir, û weke ko ew bixwe dibêje, seydayê wî di destpêka nivîsandina helbestê de, Seydayê Cegerxwîn bû, li têbîniyên wî guhdarî dikir, û ew bicî dianîn; di heman demê de, kete nav rêza tevgera Xoybûn; di sala 1943an de, li Beyrûtê serdana Mîr Kamîran Bedirxan û Nûredîn Zaza kir, û helbestek taybet ji mîr Kamîran re xwend, têde karê wî û birayê wî Mîr Celadet, di weşana herdû kovarên wan:Hawar û Stêr de, gelekî bilin nirxand, û gelekî pesnê wan da, û ji wan hêvî kir ko bimînin herdû kovaran belav bikin ….
Seydayê Tîrêj, di destpêka salên 1950î de, nêzîkî Partiya Komînîstî Sûrî, û tevgera (Hevalbendên Aşitiyê) bû, û ji ber wilo çend caran hate girtin û işkence kirin, û gelek ji helbestên wî ji dest wî çûn, û winda bûn; îcar gava ko malbava wî parçe zeviyek li nav hoza Cibûriyan a Ereb kirîn, ew çû li ser wê niştecî bû, û ji çavdêrî û şopandina desthelatdaran dûr ket; çawa Şoreşa Êlûlê, sala 1961ê destpêkir, gelekî bi coş û dilgermî piştgiriya wê û serokê wê, nemir Mela mustefa yê Barzanî kir, û gelek helbestên xweş û gelekî hest germ li ser wan nivîsîn, pesnê Şoreşê, serokê wê, û Pêşmergeyên wê ên qehreman, di wan helbestan de da, û heya roja dawî ji jiyana xwe ,Tîrêj ma pabendê van bîr û baweriyên xwe ên netewî, pabendî rêbaza Barzanî yê nemir ….
Seydayê Tîrêj, sala 1972an li bajarê Hisiça niştecî bû, jiyana xwe ya mayî li wir bûrand, di nav cemawerên gelê xwe de, di nav hezkerê helbestên xwe de, bi taybetî di nav helbestvan, nivîskar, û rewşenbîran de, û di nav siyasetvanan de jî, cihekî wî yî berz û bala hebû, wan herdem serdana wî dikirin, diçûn civata wî, û pêre dimeşiyan ….
Seydayê Tîrêj gelekî hestyar û hest tenik bû, selîqeyeke wî peleberz di hûnan û nivîsandina helbestan de hebû, gelek wêneyên wêjeyî ên bedew û spehî, di cîde û ji ber xwe ve li ser zimanê wî diherikîn; sê dîwanên helbestên wî çapkirî hene: Xelat, Cûdî, û Zozan, û pirtûka (Serpêhatiyên Kurda) birra yek û birra dido, mewlûda pêxember jî çapkirîne û hatine weşandin ...
Di van rojên bên de, û nêzîk, wê Yekîtiya Giştî ya Nivîskar û Rojnamevanên Kurd li Sûriye, simînareke Enternêtî li ser jiyana wî, kar û xebata wî, û berhemên wî li darxe, wê çend helbestvan, nivîskar, û rewşenbîr têde amade bibin û biaxivin ….
Bera giyanê Seydayê Tîrêj her û her şad û di aramiyê de be, cihê wî buhişt be, serê gelê me û hemû hezkerê helbestên wî sax bin ….

Yekîtiya Giştî ya Nivîskar û Rojnamevanên Kurd li Sûriye

 23.03.2021


 
Gotar Nerîne Xwediyê Xwene
 

Puanên Nûçeyê

Asta Dengan: 5
Bi Tevahî Deng: 1


Ji kerema xwe re kurtedemeke xwe bide vê dengdanê:

Herî baş
Pir baş
Baş
Ne xirab
Xirab

Vebijark