Sereke | Beşê Erebî | Beşê Çandî | Gotarekî Rêke | Erşîv

Sereke

Ger



 

 
 

Gotar: Qamişlo di Çend Wêneyan de

 


Konê Reş

Qamişlo sembola biratiya gelan e, hin bi bihewildanin wê biratiyê ser jêbikin..
Qamişlo berdewamiya xelkên (Mar Yaqûb Nisêbînî) û (Mazilevdînê nava Nisêbînê) ye, hin dixwazin wê berdewamiyê nema bikin û bi perçiqîn in..
Qamişlo, kilîta dergehê berriya Mêrdînê ye, hin bi hin kilîtên sexte li dergehên wê têne ceribandin..


Qamişlo, rezekî têr tirî ye, hin bi hin goşiyên tiriyê wê diçilmis in..

Qamişlo, mêşdanek kewarên hingivîn e, hin bi hin moz û şalûl raser dibin ..

Qamişlo darek çinarê ye, ne di çax û demên pêwîst de, pelên wê têne weşandin..

Qamişlo, kaniyek ava sar e, hin bi hin çaviyên wê têne xitimandin..

Qamişlo, wek hespek kihêl e, hin bi hin êmê wê kêm dibe..

Qamişlo, kelehek dorpêçayî ye, hin bi hin dergevanên wê pişta xwe didinê..

Jiyana xelkên ji Qamişlo derketî, ji jiyana xelkên hatî, xweştir e. Bi kêmayî yên derketî bi xan û man bûn. Yên hatî li xaniyên kirê digerin û dimînin heyirî..

Di wextekî de Qamişlo hêlîn û lûsê penaberên hejar û belangaza bû, îro ew lûs xera dibe, ew hêlîn diherife û êdî nema zanin berê xwe bidin kû, herin kû?

Qamişlo bûka Cizîrê bû, navenda danê bû, hêviya serdana gerokan bû, îro di bihabûnek zor qube de derbas dibe.. Ji feqîr û hejarên wê re xela ye, xela..

Li bajarê Qamişlo, bi dehan mal bê şîv radizên û hin bi hin malên bê şîv pirr dibin..

Êdî nema li Qamişlo, banga melayên mizgeftan û zingilên dêran wek berê bi evîndarî deng didin...

Li Qamişlo, kolana Quwetlî dergehên xwe girtiye û kolana Manok ala xemgîniyê bilind kiriye..

Her roj li goristanên bajarê Qamişlo goven û dîlana şehîdekî li dar dikeve..

Her roj, destê bi dehan ji evîndarên Qamişlo ji hev qut dibe..

Li Qamişlo, ji nebûna zilaman bi dehan komeleyên jinan têne ava kirin...

Qamişlo hêlîna hejar, belengaz û tengezarên rojava ye, terorîst bi hewildanin wê hêlînê biherifîn in..

Qamişlo Parîsa biçûk e, hin bi hewildanin wê bikin Kabol, Qendehar û Torabora biçûk..

Li bajarê min, hin bi hin malbatî, eşîrtî, êlitî û nijadperestî serê xwe bilind dike..

Hê jî rêxistinên me di diyaloga hêk ji mirîşkê ye an mirîşk ji hêkê ye, berdewam in..

Qet hay û bayê berpirsyarên me ji dîrokê û nifşên nû nîne, bîr nabin ku paşeroj ji wan re ye, ewin yên ku wan di dadgeha gel de tewanbar bikin..

Li herêma min 43 gund hin bi hin dibin bajar û 4300 gund hin bi hin dibin kavil û wêran.

Qamişlo û Rojava mîna çîroka Dîk û Ga ye, eger em li Qamişlo bigerin û pirsa wê bikin ga winda nabe..

Konê Reş
Qamişlo 25.08.2013

 
Gotar Nerîne Xwediyê Xwene
 

Puanên Nûçeyê

Asta Dengan: 3.28
Bi Tevahî Deng: 7


Ji kerema xwe re kurtedemeke xwe bide vê dengdanê:

Herî baş
Pir baş
Baş
Ne xirab
Xirab

Vebijark